RC KUNENGE AKERWA NA MIGOGORO YA ARDHI

MKUU wa mkoa wa Pwani Abubakari Kunenge amekasirishwa na kuendelea kwa migogoro ya wakulima na wafugaji licha ya kuwa na sheria za kukabili migogoro hiyo hali inayofanya viongozi kutumia muda mwingi kusuluhisha na kuacha kufanya shughuli za maendeleo.

Kunenge ameyasema hayo mjini Kibaha wakati wa mkutano wa mashauriano kuhusu Mpango wa kukabiliana na migogoro baina ya wafugaji na watumiaji wengine wa ardhi kwa kutumia mfumo wa ranchi ndogo kwenye mkoa huo.

Amesema migogoro hiyo iishe na ibaki historia na mkoa hauwezi kuwafumbia macho watendaji na wataalam ambao wataonekana kuwa wanashiriki kwenye migogoro hiyo ambayo imesababisha viongozi kutofanya shughuli nyingine na kubaki kusuluhisha migogoro hiyo.

Naye mkuu wa Wilaya ya Bagamoyo Zainab Abdala amesema kuwa migogoro hiyo ni kero kubwa sana ambapo wakati wanaitatua wanapigiwa simu na baadhi ya vigogo.

Abdala amesema wafugaji hao wamekuwa wakitumika na baadhi ya watu wenye uwezo ambao ndiyo wanaowakingia kifua na kusababisha wafugaji kukosa haki zao.

Kwa upande wake mbunge wa Jimbo la Chalinze Ridhiwani Kikwete amesema  changamoto kubwa ni wafugaji wavamizi kuingia kwenye maeneo bila ya kufuata sheria.

WAWILI MKOANI RUVUMA WASAKWA NA POLISI KWA TUHUMA ZA KUUA WAKE ZAO

Kaimu Kamanda wa Polisi wa Mkoa wa Ruvuma Pili Mande akizungumza na baadhi ya waandishi wa Habari wa mkoa huo kufuatia wanaume wawili kuua wake zao kwa wivu wa kimapenzi.

Na Amon Mtega, Ruvuma

JESHI la polisi mkoani Ruvuma linawasaka watu wawili katika matukio tofauti kwa tuhuma za kuwashambulia kwa vipigo wake zao na kuwasababishia vifo.

Akizungumza na waandishi wa habari ofisini kwake jana Kaimu Kamanda wa Polisi Mkoa wa Ruvuma Pili Mande amelitaja tukio la kwanza limetokea Oktoba 31 mwaka huu majira ya mchana huko katika Mtaa wa Mateka manispaa ya Songea.

Mande amesema kuwa inadaiwa kuwa Marehemu huyo ambaye jina lake limehifadhiwa kabla ya kifo chake alikuwa kwenye sherehe nyumba ya jirani yao akiwa amesimama na mwanaume mwingine kwenye sherehe hiyo na ndipo alipokutwa na mme wake ambaye naye jina limehifadhiwa kwa sababu za kiuchunguzi zaidi.

Amesema kuwa baada ya kukutwa na mume wake huyo akiwa amesimama na mwanaume mwingine alianza kumshambulia kwa kumshushia kipigo katika maeneo mbalimbali ya mwili na kumsababishia Bandama kupasuka jambo ambalo lilipelekea kuvuja kwa damu nyingi hadi kifo kutokea.

Baadhi ya waandishi wa Habari wa Mkoani Ruvuma wakimsikiliza kaimu Kamanda wa Polisi wa Mkoa wa Ruvuma Pili Mande wakati akizungumzia juu wanaume wawili kuua wake zao kwa wivu wa kimapenzi.

Kamanda  Mande alifafanua kuwa inadaiwa mtuhumiwa baada ya kumshushia kipigo mke wake na kugundua kuwa ameua alimchukua mtoto wake na kwenda kumtelekeza kwa baba yake mzazi ambaye jina lake limehifadhiwa  kisha baadae alikimbia na kutokomea kusikojulikana.

Aidha kaimu kamanda Mande amelitaja tukio la pili kuwa limetokea Oktoba 28 mwaka huu majira ya usiku huko katika kijiji cha Mageuzi Wilaya ya Namtumbo mkoani Ruvuma ambapo mwanamke mmoja ambaye jina lake halikutajwa mwenye umri wa miaka 33 inadaiwa kuwa alipigwa na shoka kichwani kutokana na mume wake kumtuhumu kuwa ana mahusiano ya kimapenzi na wanaume wengine.

Alieleza kuwa wapenzi hao walikuwa wametengana lakini siku ya tukio bwana alimlaghai mpenzi wake wa kike kwa kumywesha pombe kisha kwenda nae nyumbani kwake ambako baadae alimshambulia kwa kumpiga na shoka kichwani na kumsababishia kifo.

Mtuhumiwa baada ya tukio hilo inadaiwa kuwa aliuza mahindi na maharage ambayo alipata nauli kisha alikimbia na kutokomea kusiko julikana na polisi inaendelea kumsaka.

Jeshi la polisi kutokana na matukio hayo kukithiri mkoani humo limekemea na kulaani vikali kwa mtu yeyote atakayebainika kumshambulia kwa kumpiga mke wake au mume wake atachukuliwa hatua kali za kisheria bila kujali wadhifa wake kwa kuwa mashambulio hayo yanaleta madhara makubwa kwa familia na jamii kwa ujumla na si vinginevyo.

Katika hatua myimgine kaimu kamanda Mande amesema kuwa kwa wale wanaomiliki silaha kinyume cha sheria amewataka wajisalimishe wenyewe kwenye vituo vya polisi vilivyopo jirani kuanzia Novemba mosi hadi Novemba 30 mwaka huu

MTOTO WA MIAKA (3) AFARIKI DUNIA KWA KUDONDOKEWA NA MATOFALI.

Mtoto mwenye umri wa miaka ( 3) aliyejulikana kwa jina la Agness Charles mkazi wa wilaya ya Meatu Mkoa Simiyu amefariki dunia baada ya kudondokewa na matofali ya nyumba yao.

Kamanda wa Jeshi la Polisi Mkoa wa Simiyu Kamishna Msaidizi Richard Abwao amethibitisha kutokea kwa tukio hilo na kusema kuwa limetokea septemba 29 mwaka huu majira ya saa 2:00 usiku katika kijiji cha Mwanzangamba kata ya Mwanyahina Tarafa ya Kimali Wilayani Meatu.

Abwao amesema kuwa tukio hilo limetukia kufuatia tembo wawili kubomoa nyumba aliyolala mtoto huyo wakati wakiwa wanatafuta chakula aina ya viazi vikavu maarufu kama "michembe" baada ya kugundua kuwa ndani ya nyumba hiyo kuna chakula wanachohitaji.

Amesema mama mtoto huyo alikuwa wa kwanza kumuokoa na kumpeleka hospitali ya wilaya ya Meatu mara baada ya tembo hao kuondoka hata hivyo walikuta tayari ameshafariki.

Mwili wa marehemu umefanyiwa uchunguzi na daktari katika hospitali ya wilaya ya Meatu na kukabidhiwa kwa ndugu kwa ajili ya mazishi.

Jeshi la Polisi Mkoa wa Simiyu linatoa wito kwa wananchi wanaoishi jirani na maeneo ya hifadhi kuendelea kuchukua tahadhari zinazotolewa na wataalam ili kudhibiti tembo kuingia vijijini.